Tume ya Ulinzi wa Taarifa Binafsi (PDPC) imeendelea kuimarisha uelewa wa wafanyabiashara kuhusu umuhimu wa ulinzi wa faragha na taarifa binafsi, wakati wa Mkutano wa Tisa wa Baraza la Biashara Mkoa wa Njombe uliofanyika Februari 17, 2026 katika Ukumbi wa Ofisi ya Mkuu wa Mkoa wa Njombe.

Akitoa elimu hiyo, Mkuu wa Uhusiano kwa Umma na Mawasiliano wa PDPC Bw. Innocent Mungy, kwa niaba ya Mkurugenzi Mkuu PDPC Dkt. Emmanuel Lameck Mkilia, amefikisha salamu na pongezi kwa wafanyabiashara wa mkoa huo kwa mchango wao katika kukuza uchumi wa taifa na kuwasisitiza kuwa ulinzi wa taarifa binafsi si suala la kisheria pekee, bali ni msingi wa uaminifu katika biashara za kisasa. 

“Haki ya faragha ni haki ya msingi ya binadamu inayolindwa na Katiba ya Jamhuri ya Muungano wa Tanzania, na biashara yoyote inayokusanya au kuchakata taarifa binafsi ina wajibu wa kuzilinda kwa mujibu wa Sheria ya Ulinzi wa Taarifa Binafsi, Sura ya 44 ambayo  ni sehemu ya mfumo wa sheria pacha tatu za uchumi wa kidijitali zinazojumuisha Sheria ya Miamala ya Kielektroniki na Sheria ya Usalama Mtandao, ambazo kwa pamoja zinajenga mazingira salama na yenye uaminifu kwa biashara na huduma za kidijitali” amesema Bw. Mungy.

Wafanyabiashara hao wametakiwa kuzingatia misingi ya ulinzi wa taarifa, ikiwemo kukusanya taarifa zinazohitajika tu, kuzilinda dhidi ya uvujaji, kuzitumia kwa madhumuni yaliyokusudiwa, na kuwapa wafanyakazi wao elimu kuhusu wajibu wa kulinda taarifa za wateja.

PDPC inaendelea kuwakumbusha wafanyabiashara wote kuwa muda wa nyongeza wa usajili wa hiari kwa taasisi na biashara zinazokusanya na kuchakata taarifa binafsi unaisha tarehe 8 Aprili 2026, na baada ya hapo Tume itaanza ukaguzi wa utekelezaji wa sheria kwa mujibu wa maelekezo ya Serikali, hivyo watumie muda uliobaki kujisajili, kuboresha mifumo yao ya ulinzi wa taarifa, na kujenga biashara zinazolinda faragha, uaminifu na ushindani katika soko la kisasa la kidijitali.